By Ásgeir Ingvarsson

19.03.2020 14:40

By Ásgeir Ingvarsson

Hannes A. Hannesson forstöðumaður TVG Xpress og Hjörvar Hermannsson framkvæmdastjóri Smartmedia

Mikil aukning hefur verið í netverslun undanfarnar vikur. Smartmedia og TVG Xpress hafa ákveðið að fara í samstarf með það að markmiði að bjóða upp á fjölbreyttara úrval afhendingarleiða.

Smartmedia og TVG Xpress, dótturfélag TVG-Zimsen hafa undirritað samstarfssamning sem mun skila stórauknu framboði í afhendingarleiðum fyrir viðskiptavini Smartmedia. Yfir hundrað fyrirtæki keyra netverslanir sínar á hugbúnaði frá Smartmedia en netverslun hefur líklega aldrei verið stærri en nú og mun þetta því auðvelda alla sölu til muna.  

„Við hjá Smartmedia erum virkilega ánægð með þetta samstarf og fögnum aukinni samkeppni á markaði þegar kemur að afhendingu á vörum,“ segir Hjörvar Hermannsson, framkvæmdastjóri Smartmedia. 

„Netverslun hefur aukist mikið undanfarin ár, og þá ekki síst undanfarnar vikur í þeim aðstæðum sem við erum að glíma við í þjóðfélaginu í dag. TVG Xpress hefur góða þekkingu og reynslu af þjónustu við netverslanir og mismunandi afhendingarmöguleika en það er mikil þörf á fjölbreyttum afhendingarmöguleikum í samfélaginu núna og því er þetta kærkomið samstarf,“ bætir hann við.

„Við höfum verið að auka þjónustu okkar við netverslanir með mismunandi afhendingarmöguleikum. Nú geta viðskiptavinir sótt sendingarnar sínar til okkar í Vatnagarða 22, í box á valda afgreiðslustaði eða fengið heimsent samdægurs.“ segir Hannes A. Hannesson forstöðumaður TVG Xpress og bætir við: „Það er ljóst að ljósi aðstæðna fer netverslun bara vaxandi og það er mikilvægt að geta mætt viðskiptavinum á þeirra forsendum, hvort sem þeir vilja sækja sjálfir eða fá sent.“

Fleiri fréttir